МІНСК, 23 сту — Sputnik. Хакейны клуб "Дынама-Мінск" пацярпеў хатняе паражэнне ў рэгулярным чэмпіянаце Кантынентальнай хакейнай лігі (КХЛ) ад "Адмірала" з Уладзівастока, паведамляе карэспандэнт Sputnik.
У панядзелак, 22 студзеня, на "Мінск-Арэне" падапечныя Гордзі Дуайера прымалі ў гасцях "маракоў" з Уладзівастока. Сустрэча завяршылася з лікам 3: 2 на карысць гасцей.
У складзе гаспадароў шайбы ў вароты сапернікаў закінулі Шарль Лінгле (25 хвіліна) і Джасцін Фантэйн (30), у складзе гасцей вызначыліся Іван Мішчанка (36 і 42) і Кірыл Варонін (60).
Пасля 53 паядынкаў "зубры" займаюць дзесятае месца ў табліцы Заходняй канферэнцыі КХЛ, набраўшы 67 балаў. Да канца "рэгуляркі" засталося тры матчы. Адставанне ад восьмага месца, на якім размяшчаецца маскоўскі "Спартак", складае 12 ачкоў. Такім чынам "бела-сінія" страцілі ўсе шанцы на выхад у накаўт-раўнд.
"Адмірал", які займае 12-е месца на Усходзе (58 ачкоў), развітаўся з плэй-оф Кубка Гагарына.
Наступную сустрэчу мінчане правядуць 25 студзеня дома супраць "Славана", а "маракі" адправяцца 26 студзеня ў госці да "Амура" у Хабараўск.
