МІНСК, 15 сак — Sputnik. Экс-першую ракетку свету беларуску Вікторыю Азаранка запрасілі выступіць у асноўнай сетцы турніру катэгорыі "Прэм'ер" у Маямі, паведамляецца на афіцыйным сайце турніру.
Тэнісістка вярнулася на корт пасля працяглай паўзы ў кар'еры, звязанай з праблемамі ў сям'і, на турніры ў амерыканскім Індыян-Уэлсе. Азаранка дайшла да другога круга спаборніцтваў, дзе пацярпела паразу ад Слоан Стывенс (ЗША).
Беларуска атрымала wild card (адмысловае запрашэнне) ад арганізатараў турніру ў Маямі. Гэта значыць, што Азаранка прапусціць кваліфікацыю і пачне барацьбу за трафей з асноўнай сеткі.
Тэнісістка раней тройчы перамагала ў Маямі (2009, 2011 і 2016 гады).
Акрамя Азаранка, wild card атрымала васьмікратная пераможца гэтых спаборніцтваў Серэна Уільямс. Для амерыканкі турнір у Маямі стане другім пасля перапынку ў кар'еры, звязанага з нараджэннем дачкі.
Спецзапрашэнні таксама атрымалі Айле Тамляновіч, Аманда Анісімава, Клэр Лю, Уітні Асігвэ, Бернард Пэрэ і Бетані Матэк-Сандс.
У мужчын у асноўную сетку запрасілі Крыстафера Юбенкса, Міколу Куна, Мікаэля Імера, Міамара Кечмановіча і Нікаласа Хары.
