МІНСК, 25 ліп — Sputnik. Экс-першая ракетка свету беларуска Вікторыя Азаранка атрымала адмысловае запрашэнне (wild card) ад арганізатараў турніру катэгорыі "Прэм'ер" у канадскім Манрэалі, паведамляецца на афіцыйным сайце Жаночай тэніснай асацыяцыі (WTA).
У мінулы раз Азаранка прымала ўдзел у Rogers Cup тры гады таму. Тэнісістка дайшла да трэцяга круга, дзе прайграла Сары Эрані.
Разам з беларускай спецзапрашэнне атрымала яшчэ адна былая першая ракетка свету амерыканка Серэна Уільямс. Яна таксама выступала ў Манрэалі ў апошні раз у 2015 годзе. Уільямс-малодшая тройчы перамагала на турніры (2001, 2011, 2013 гады).
Яшчэ дзве wild card атрымаюць мясцовыя тэнісісткі, імёны якіх будуць названы пазней. У ліку іншых, у Канаду прыедуць першыя 25 нумароў рэйтынгу WTA.
Турнір стартуе 3 жніўня і завершыцца 12 жніўня. Прызавы фонд амаль тры мільёны долараў. У мінулым годзе Адкрыты чэмпіянат Канады выйграла прадстаўніца Украіны Эліна Світоліна.
