МІНСК, 24 кас - Sputnik. Саўмін дазволіў уезд у Беларусь па білеце або копіі электроннага білета Еўрапейскіх гульняў, гаворыцца ў пастанове ўрада.
Квіткі паступяць у продаж 1 снежня гэтага года, набыць іх можна будзе да 30 чэрвеня 2019 года. Копію электроннага білета можна будзе абмяняць на арыгінальны квіток у білетных касах.
Увагу патэнцыйных гасцей звяртаюць на тое, што падроблены білет абмену не падлягае і не дае права прысутнічаць на мерапрыемствах у рамках гульняў, так што будзьце ўважлівыя пры куплі. Квіток павінен быць аформлены на фірменным бланку і змяшчаць абавязковыя рэквізіты, у тым ліку найменне мерапрыемства на англійскай мове, найменне мерапрыемства на рускай мове, сімволіку II Еўрапейскіх гульняў і іншыя.
У пастанове таксама вызначылі парадак згадкі спонсараў і партнёраў Еўрапейскіх гульняў у СМІ. Таксама агавораны парадак выдачы заключэнняў, якія тычацца расходу тавараў, вылучаных у якасці ўзнагародных трафеяў або бясплатнай раздачы ў рамках "Еўрапейскіх гульняў".
Як патлумачылі ў Пагранкамітэце Беларусі, віза пры наяўнасці білета не абавязковая. Пры гэтым у Беларусь замежныя грамадзяне з квіткамі змогуць ехаць праз тэрыторыю Расіі, для чаго віза ім таксама не спатрэбіцца. Гэта прадугледжана падпісаным у маі бягучага года адмысловым "спартыўным пагадненнем", якое таксама дазваляла спартыўным заўзятарам падчас Чэмпіянату свету па футболе ў Расіі перасякаць тэрыторыю Беларусі без візы, маючы на руках фан-карту чэмпіянату.
