МІНСК, 31 сту - Sputnik. Расійскія лёгкаатлеты выступяць на II Еўрапейскіх гульнях у Мінску пад сцягам РФ, заявіў прэзідэнт Алімпійскага камітэта Расіі Станіслаў Пазнякоў.
Сяброўства Усерасійскай федэрацыі лёгкай атлетыкі (УФЛА) у Міжнароднай асацыяцыі лёгкаатлетычных федэрацый (IAAF) было прыпынена чатыры гады таму. У сувязі з гэтым расіяне могуць прымаць удзел у турнірах за мяжой, атрымаўшы індывідуальны допуск і толькі пад нейтральным сцягам.
"Што да ўдзелу ў алімпійскіх мерапрыемствах прадстаўнікоў адхіленай федэрацыі, у прыватнасці УФЛА, нашы спартсмены змогуць выступіць на юнацкім Алімпійскім фестывалі ў Баку і на Еўрапейскіх гульнях у Мінску пад сцягам зборнай Расіі", - сказаў Пазнякоў.
Мінск у чэрвені прыме Еўрапейскія гульні, а Еўрапейскі юнацкі алімпійскі летні фестываль пройдзе ў Баку ў ліпені.
У мінулую пятніцу IAAF заявіла, што УФЛА не можа быць адноўленая ў правах на пасяджэнні ў сакавіку, бо расійскі бок не выканаў ні адзін з крытэраў. Такім чынам, да лета расіяне могуць выступаць на спаборніцтвах толькі ў статусе нейтральных спартсменаў.
