МІНСК, 24 чэр - Sputnik. Зборная Беларусі ў нядзелю 23 чэрвеня заваявала на II Еўрапейскіх гульнях, што праходзяць гэтымі днямі ў Мінску, 20 медалёў, перадае карэспандэнт Sputnik.
Чарговы дзень гульняў быў для нацыянальнай зборнай рэзультатыўней за папярэдні: у суботу 22 чэрвеня ў скарбонцы рэспублікі было 14 узнагарод, у тым ліку чатыры залатыя.
У нядзелю беларусы прыкметна палепшылі якасць узнагарод: наша зборная змагла заваяваць шэсць узнагарод вышэйшай пробы. На першую прыступку п'едэстала падымаліся гімнасткі Анастасія Рыбакова, Карына Ярмоленка, Арына Цыцыліна, Ганна Швайба і Ганна Гайдукевіч (двойчы), кідальніца дзіды Таццяна Халадовіч, Эльвіра Герман (100 метраў з бар'ерамі) і скакун у вышыню Максім Недасека, а таксама самбістка Вера Гарэлікава.
Тры срэбры ў скарбонку паклалі самбісты Марына Жарская, Юрый Рыбак і Андрэй Казусёнак, адно - гімнастка Кацярына Галкіна, яшчэ тры - лёгкаатлеты Крысціна Ціманоўская (бег на 100 метраў), Анастасія Мірончык-Іванова (скачкі ў даўжыню) і Віталь Парахонька (бег на 110 метраў з бар'ерамі).
Бронзавыя ўзнагароды заваявалі гімнасткі ў групавых практыкаваннях, самбісты і спартсмены, якія выступалі ў спартыўнай акрабатыцы.
Зараз у актыве спартсменаў Беларусі 34 медалі - дзесяць залатых, дзевяць срэбных, 15 бронзавых. У агульным заліку беларуская каманда займае другое месца: больш узнагарод толькі ў расіян - 39 (19-10-10).
Еўрапейскія гульні працягнуцца ў панядзелак у Мінску
Чацвёрты дзень спаборніцтваў на II Еўрапейскіх гульнях адкрыецца турнірам па бадмінтоне і стральбе з лука. У гэты дзень стануць вядомыя імя медалістаў па спартыўнай аэробіцы, баскетболе 3х3, дзюдо, скачках на батуце, стральбе з лука і кулявой стральбе.
Як і ў папярэднія дні, мноства падзей будуць звязаныя не толькі са спартыўнымі мерапрыемствамі, але і фан-зонамі. Працягваюць працаваць усе асноўныя фан-зоны ў сталіцы і іншых гарадах, а таксама Дом заўзятараў каманды Расіі.
