МІНСК, 21 лют - Sputnik. Еўрапейскі саюз абнаўляе свае візавыя правілы, каб палепшыць умовы для законапаслухмяных падарожнікаў і пашырыць інструменты, даступныя для вырашэння праблем, звязаных з нелегальнай міграцыяй, гаворыцца ў паведамленні Савета Еўропы.
Паслы краін, якія ўваходзяць у Еўрапейскі саюз, пацвердзілі 20 лютага, што дасягнута пагадненне паміж прадстаўнікамі Еўрапарламента і Румыніяй, якая старшынствуе ў Савеце, па зменах у візавы кодэкс.
Сярод навацый у Савеце Еўропы пералічылі:
- дазвол на падачу заявак на візу за 6 месяцаў і не пазней, чым за 15 дзён да паездкі;
- запаўненне і падпісанне заяўкі на візу ў электронным выглядзе;
- выдача шматразовых віз падарожнікам з станоўчай гісторыяй візавага знаходжання на перыяд, які паступова павялічваецца ад 1 да 5 гадоў.
Пры гэтым у ЕС прапануюць для таго, "каб дзяржавы-члены маглі лепш пакрываць выдаткі на афармленне візы, не ствараючы перашкод для заяўнікаў", візавы збор паступова павялічыць да 80 еўра.
Пры гэтым у Савеце Еўропы адзначылі, што ў выпадку калі з трэцяй краінай заключана пагадненне аб рэадмісіі і яно працуе, для такіх дзяржаў кошт візы можа быць скарочаны, як і тэрміны разгляду заявак ад яе грамадзян.
У цяперашні час кошт шэнгенскіх візаў для беларусаў складае 60 еўра. Беларусь і ЕС практычна дасягнулі пагаднення аб спрашчэнні візавага рэжыму, і ў выпадку яго падпісання грамадзяне рэспублікі будуць плаціць за візы 35 еўра. Пры гэтым ёсць верагоднасць, што да ўступлення новых візавых правілаў беларускі МЗС можа не паспець пра ўсё дамовіцца, і тады на нейкі час візы для беларусаў падаражэюць да 80 еўра.
