МІНСК, 23 вер - Sputnik. Беларуская кампанія "Белавія" агучыла расклад рэйсаў па маршруце Мінск-Масква, адпаведная інфармацыя з'явілася на афіцыйным сайце кампаніі. Паведамляецца, што вылет з Мінска будзе ажыццяўляцца ў 00:35, з Масквы - а 14:45. Час у шляху складзе 1 гадзіну 20 хвілін.
Палёты ў Расію перавозчык аднаўляе з 30 верасня пасля часовага перапынку, які быў звязаны з пандэміяй каронавіруса. Пакуль самалёт будзе лётаць раз на тыдзень па серадах. У Расіі працягваюць дзейнічаць абмежаванні, выкліканыя пандэміяй. Таму самалёты з Мінска прымае толькі аэрапорт Дамадзедава.
"Пасажырам, якія прыбываюць у Расійскую Федэрацыю або наступным транзітам, неабходна мець медыцынскую даведку з адмоўным вынікам ПЦР-тэсту на каронавірус (COVID-19), выдадзеную не пазней, чым за 72 гадзіны да прыбыцця. Гэта не адносіцца да грамадзян Расійскай Федэрацыі", - распавялі ў кампаніі "Белавія".
Нагадаем, вясной з-за пагрозы распаўсюджвання каронавіруса многія краіны пачалі зачыняць свае межы. У сувязі з гэтым авіяперавозчыкі, у тым ліку "Белавія", былі вымушаныя адмяніць частку рэйсаў. Улетку беларуская кампанія аднавіла авіязносіны з Малдовай, Албаніяй, Украінай, Турцыяй і шэрагам іншых краін.
