Майстар-клас па падрыхтоўцы марозіва па старадаўніх арыгінальных рэцэптах прайшоў у музеі марозіва ў Мінску. Гасцям распавялі пра тое, што першы рэцэпт халоднага дэсерту на цяперашнія беларускія землі прывезла міланская прынцэса, якая пасля стала каралевай польскай і вялікай княгіняй літоўскай Бона Сфорца.
"Не будзем успамінаць гісторыю, што яна атруціла ўсіх — не марозівам. Марозіва ў яе добрае, яно было з яек. Гэта была такая яечная маса. У нашым выкананні яно будзе з бялкамі, але я падазраю, што ўсё ж такі гістарычна яна гатавала на жаўтке", — распавяла Sputnik вядучая майстар-класа пісьменніца і фуд-блогер Арына Лісецкая.
Гэта марозіва магла дазволіць сабе толькі знаць, бо ў XVI стагоддзі дэсерт марозіўся пры дапамозе солі, дадаў куратар музея Мікіта Самаль.
Галоўны сакрэт савецкага марозіва ўзору 1939 года ў тым, што туды дадавалі згушчанае малако, расказалі вядучыя.
Пасля майстар-класа абяцалі дэгустацыю. Таму жадаючых убачыць і паспрабаваць гістарычнае марозіва прыйшло шмат. У чаканні пачастунку госці, якія не маглі падабрацца да стала, шпацыравалі па музею і ахвотна фатаграфаваліся. Тыя, хто ўжо не мог чакаць, згаджаліся на фабрычнае марозіва.
Нягледзячы на ажыятаж госці, з якімі ўдалося пагутарыць Sputnik, засталіся задаволеныя мерапрыемствам.
"Падобна на крэм-брюле, вельмі салодкае. Вельмі цікава, усе дзеці хочуць хутчэй паспрабаваць марозіва другі і трэці раз. Адзіна, хацелася, каб больш марозіва было", — прызналася, зняўшы пробу з кававага марожанага XIX стагоддзя, пара маладых мінчукоў.
