На працягу больш чым дзесяці гадоў суразмоўца Sputnik збіраў архіўныя дакументы, фотаздымкі і артэфакты, якія ілюструюць, як у 20-30 гады мінулага стагоддзя рэальна функцыянавала мяжа паміж Польшчай і БССР. Гэтая частка гісторыі была незаслужана забытая ў айчыннай гістарыяграфіі, лічыць суразмоўца Sputnik.
"Будуць прадстаўлены, я лічу, унікальныя экспанаты, пачынаючы з замежных пашпартоў, а ў некаторых нават савецкія візы ўязныя 30-х гадоў. Дакументы строгай адказнасці, іх няма проста так у доступе, а ў мяне атрымалася іх набыць на аўкцыёнах, і цяпер я гэта паказваю, як выглядала ў 30-я гады працэдура атрымання гэтых дакументаў, як можна было з гэтым і дакументамі праехаць станцыю Коласава - Негарэлае", - распавядае Мельнікаў.
Таксама сярод экспанатаў - як савецкія, так і польскія дакументы, якімі вызначаўся парадак знаходжання ў памежнай зоне, і асобны стэнд, прысвечаны кантрабандыстам, чыя дзейнасць, па многіх сведчаннях, была пастаўлена "на шырокую нагу".
"Я і мае сябры даследавалі гэтую мяжу ад Верхнядзвінска да Давыд-Гарадка, аб'ехалі з поўначы на поўдзень, і амаль у кожнай вёсцы былі такія людзі - хадзілі займаліся кантрабандай... Напрыклад, грамадзяне Другой Рэчы Паспалітай мелі пашпарты, але легальна трэба было ехаць у Варшаву атрымліваць савецкую візу, але калі мяжа за кіламетр ад твайго дома, паедзеш ты ў Варшаву? Напэўна, будзеш шукаць пралаз, каб перайсці гэтую мяжу", - распавядае Мельнікаў.
Такія фрагменты гісторыі дазваляюць зразумець трагедыю беларускага народа, які быў падзелены гэтай мяжой, і трагедыю звычайнага чалавека, які быў вымушаны жыць на мяжы дзвюх цывілізацый, адзначае гісторык.
Поўную версію размовы з гісторыкам Ігарам Мельнікавым глядзіце ў відэатрансляцыі.
