Дзень святога Патрыка адзначаюць 17 сакавіка не толькі ў Ірландыі, але і ў многіх краінах свету. Калі зялёна-аранжавае шэсце ў Штатах, да прыкладу, звязана з наяўнасцю вялікай ірландскай дыяспары, то ў Беларусі гэтае хрысціянскае свята папулярна па іншых прычынах.
"Гэта, па-першае, звязана з модай. Да нас прыйшоў з Захаду і Дзень святога Валянціна, і Дзень усіх Святых. Па-другое, Дзень святога Патрыка прыпадае на час, калі 8 сакавіка ўжо адсвяткавалі, але пацешыцца людзям усё роўна хочацца", — распавяла кандыдат псіхалагічных навук Наталля Аліфіровіч.
Прыцягваюць увагу да свята і знешнія атрыбуты, калі людзі чапляюць рудыя бароды, апранаюць высокія шапкі, малююць канюшыну.
"Сёння ў нас ёсць хлеб і відовішчы, але не хапае кантакту паміж людзьмі. Дзень святога Патрыка — магчымасць сабрацца з іншымі людзьмі і падзяліць святочны настрой. Таксама гэта туга па нейкім дню, які б мог аб'яднаць усю краіну. Калі мы пачынаем адзначаць не нашы святы, пра што гэта кажа?.. Пра тое, што сваё не вельмі добра прадстаўлена", — дадала Аліфіровіч.
