Алена Васільева, Sputnik
Бліжэйшы месяц кожны інфармацыйны партал будзе спрабаваць здзівіць чытача, прапануючы паглядзець на самыя прыгожыя ялінкі ў свеце/даведацца, як Новы год святкуюць у Мьянме/etc. Адным словам, поўнае дэжавю — тое самае вам паказвалі год і два гады таму. Sputnik абраў свой шлях — калі ўжо і паўтарацца, дык мы пакажам вам тое, пра што пісалі газеты не год, а сто год таму.
Разам з карэспандэнтам Sputnik будзем чытаць пераднавагоднія выпускі беларускіх газет і пачнем з дарэвалюцыйных.
Газета "Минский голосъ", 31 снежня 1912 года
"Мінскі голас" па-шчырасці напісаў буйнымі літарамі — штотыднёвая газета, выходзіць кожны дзень, акрамя паслясвяточных дзён. 1 студзеня газета не выходзіла, каб зразумець, чаму, досыць прагледзець спіс мерапрыемстваў для наведвання, што прапаноўваліся на 31 снежня.
Між іншым, Мінск 1912 не надта адрозніваецца ад Мінска 2015 — нават хуткі агляд аб'яваў нагадвае утульную маленькую прастору з абмежаванай колькасцю бараў ды рэстаранаў, дзе, як кажуць, "усе адзін аднога ведаюць". Толькі замест "Галерэі Ў" ды "Свабоды, 4" у дарэвалюцыйным Мінск — рэстаран Г.А. Саулевіча, а замест гаспаччо — "Борщокъ консомэ, осетрина и стерлядь".
Апусцім шматлікую рэкламу елачных кірмашоў, яшчэ больш, чым елак, на старонках "Мінскага голасу" шампанскага. Напрыклад, вячэру з бакалам ігрыстага прапануе рэстаран "Фрыц", дарэчы, дамам тут абяцаюць падарункі. А адзін бізнесовец нават выпусціў да святаў карзінкі з шампанскім — па 6 і 12 бутэлек, пра тое шампанскае вядома адно — "Цена вне всякой конкуренціи".
Больш за шампанскае рэдакцыю хвалюе толькі падпіска на будучы год — пра тое, дзе і як яе аформіць, чытачу раз-пораз нагадваюць.
Газета "Наша Ніва", снежань, 1906 год
"Нашай Ніве" традыцыйна не да святаў — рэдакцыю займаюць пытанні больш надзённыя за шампанскае ды кацільёны. Адзінае, што нагадвае ў пераднавагоднім нумары пра надыходзячае свята — просьба да чытача не забыць аплаціць падпіску на надыходзячы год. Такім чынам, у навагоднім нумары першай беларускай газеты (з малюнкамі) узнімаецца галоўным чынам дзве надзённыя тэмы — фінансавая і палітычная.
Калі з першай з большага разабраліся, дык другая расцягнулася на ўвесь нумар. Пасля святаў у дарэвалюцыйным Мінску планаваліся выбары ў Думу, калумністы газеты заклікалі беларусаў-сялян прыняць у іх актыўны ўдзел, аб'яднацца з "гадарскімі" — і тады разам перамагчы паноў. То бок, гады ідуць, а галоўныя пытанні беларускай палітыкі ўсё тыя ж.
"Могилевский вестникъ", 31 снежня, 1914
Гэтым годам грамадству было не да святкаванняў і побач з навінамі пра шампанскае — такімі ж, якія мы бачылі ў Мінскай газеце, з'яўляліся ваенныя сводкі.
Тым не менш, настрою магілёўцам тое, здаецца, не псавала. Гледзячы па тэкстам, яны збіраліся святкаваць, пакуль вытрымаюць.
А кантора Sputnikъ Belarus нагадвае: аформіць падпіску на нашу групу у Facebook можна ў любы час, але ж не адкладайце на апошнія дні. Ваш Sputnikъ.
