МІНСК, 11 мая — Sputnik. У цэнтры беларускай сталіцы з панядзелка змяніўся рух грамадскага транспарту ад плошчы Змітрака Бядулі да вуліцы Батанічнай, з-за рэканструкцыі трамвайных шляхоў забаронены рух усіх відаў транспарту на гэтым участку вуліцы Казлова.
Акрамя таго, на ўвесь перыяд дарожных работ на Платонава і Чапаева будзе забаронена стаянка ў крайняй правай паласе руху ў абодвух напрамках.
"На перыяд выканання работ па рэканструкцыі трамвайнага шляху па вул. Казлова з 11 мая і арыентыровачна да 1 верасня закрываецца трамвайны рух па вуліцы Казлова на ўчастку ад разваротнага трамвайнага кальца на плошчы Змітрака Бядулі да вуліцы Батанічнай", — паведамілі Sputnik ў дзяржаўным прадпрыемстве "Мінсктранс".
Суразмоўцы агенцтва падкрэслілі, што ў сувязі з рамонтнымі работамі арыентыровачна да 1 ліпеня на гэтым участку вуліцы Казлова да перасячэння з вуліцай Платонава забараняецца рух усіх відаў транспарту.
У расклад грамадскага транспарту часова ўнесены змены. У прыватнасці, адмяняецца трамвайны маршрут №3 і арганізуецца трамвайны маршрут №10 "ДС Возера — праспект Незалежнасці".
Рух трамвайнага маршруту №6 арганізуецца ад "ДС Серабранка" да прыпыначнага пункта "завулак Казлова" з разваротам на тэрыторыі філіяла "Трамвайны парк". Адначасова будзе прадугледжана істотнае павелічэнне колькасці рухомага складу на трамвайных маршрутах №9, 11.
Трамвайны маршрут №9 часова будзе працаваць цэлы дзень.
Арганізуецца рух аўтобусных маршрутаў:
- №19 — па вуліцах Казлова, Бядулі, Чапаева, Платонава, Казлова з выкананнем прыпыначных пунктаў "Змітрака Бядулі", "Платонава" ў абодвух напрамках;
- № 901-прадаўжаецца да Камароўскага рынку з рухам па вуліцах Бядулі, Казлова, праспекце Машэрава, Куйбышава, В. Харужай у прамым напрамку, вуліцах В.Харужай, Чырвонай, праспекце Машэрава, Казлова, З.Бядулі, Першамайскай і далей па маршруту — ў зваротным кірунку.
- №907 — "Будзёнага — Камароўскі рынак" з рухам па вуліцах Даўгабродскай, Казлова, Платонава, Чапаева, Бядулі, Казлова, праспекце Машэрава, Куйбышава, Харужай у прамым напрамку, вуліцах Харужай, Чырвонай, праспекце Машэрава, Казлова, Бядулі, Чапаева, Платонава, Казлова, Даўгабродскай і далей па маршруту — ў зваротным кірунку.
У ДП "Мінсктранс" падкрэслілі, што пасажыры, якія маюць шматразовыя праязныя на трамвай, да канца мая могуць імі скарыстацца для праезду ў аўтобусах маршрутаў №19, 901, 907 на ўчастках, якія дублюцца ці зачыняюцца. У чэрвені яны павінны будуць набыць праязныя і на аўтобус.
