МІНСК, 21 мая — Sputnik. На гэтых выходных беларусы могуць апрабаваць на сабе адпачынак, за якім да нас у краіну звычайна прыязджаюць еўрапейцы і расіяне. 24 мая наведванне больш за 500 беларускіх аграсядзібаў стане цалкам бясплатным, а ўладальнікі будуць забаўляць гасцей майстар-класамі, экскурсіямі і пачастункамі.
Турыстаў запрашаюць пазнаёміцца з адпачынкам у беларускай вёсцы. Як правіла, у гэты дзень кожная сядзіба сустракае наведвальнікаў спецыяльнай праграмай, гаспадары аграсядзібаў праводзяць экскурсіі і прэзентацыі мясцовых абрадаў, знаёмяць гасцей з турыстычнымі маршрутамі.
Дзень адчыненых дзвярэй у аграсядзібах — штогадовае мерапрыемства. Летась, падчас правядзення Чэмпіянату свету па хакеі, мерапрыемства доўжылася цэлы тыдзень.
Сёлета дзверы сядзібаў будуць адкрыты ўсяго адзін дзень. Любы жадаючы зможа бясплатна наведаць упадабаную аграсядзібу, папярэдне паведаміўшы пра сваё жаданне яе уладальнікам, і правесці там выхадны дзень. Спіс даступных аб'ектаў у бліжэйшыя дні з'явіцца на сайце грамадскага аб'яднання "Адпачынак у вёсцы".
