МІНСК, 30 мая — Sputnik, Яўген Казарцаў. Выстава "Ралан Барт. Ключавыя словы" адкрылася ў гонар 100-годдзя выдатнага французскага філосафа, яе арганізатары спадзяюцца зацікавіць мінчан сучаснай трактоўкай філасофіі.
Арт-прастора "ЦЭХ" падзелена на два асноўных памяшканні: адно з іх — месца для прэзентацый і лекцый, абмеркаванняў работ Барта, другое — непасрэдна выстава.
"Мы хацелі б звярнуць увагу мінчан на філосафа. І гэта не першае падобнае мерапрыемства: мы плануем праводзіць і канферэнцыі, і іншыя выставы — прылучаць людзей да культуры і навукі Францыі", — сказаў карэспандэнту Sputnik супрацоўнік пасольства Францыі, са-дырэктар Франка-беларускага цэнтра еўрапейскіх даследаванняў (CFB) Ксаўе Ле Тарывелек.
На выставе можна пазнаёміцца і з працамі Ралана Барта: для жадаючых тут ляжаць асобнікі яго кніг, а частку самой экспазіцыі складаюць вытрымкі з прац філосафа. Ёсць у рамках экспазіцыі месца і эксперыменту: мастакі стварылі "візуальныу мову" разважанняў Барта. Напрыклад, відэа аб тым, як людзі могуць ўспрымаць і інтэрпрэтаваць незнаёмага чалавека — па фатаграфіі яны апісваюць жыццё і характар.
"Адна з нашых галоўных задач — спрабаваць данесці да мінчан думкі Барта. Каб прыцягваць людзей да навукі трэба ўжываць усе сродкі і медыяканалы. Таму, хочацца верыць, што карысць ад выставы будзе: людзі пазнаёмяцца з думкамі філосафа і, магчыма, зацікавяцца", — сказала куратар выставы Альміра Усманава.
Сучаснае мастацтва ў многіх выклікае пытанні: кажуць, яно незразумела і бессэнсоўна. Так ці мае сэнс спрабаваць зацікавіць публіку, выкарыстоўваючы тыя метады, якія масавага гледачу не зразумець?
"Мы хочам адукоўваць людзей. Таму гэта — не праблема. Давайце казаць шчыра: Беларусь — усё ж правінцыйная краіна. І мы спадзяемся гэта змяніць, спрабуем і даносіць веды, і паказваць, як можна ствараць канцэптуальную выставу. Працаваць і з публічным прасторай, і з мастацтвам, і з навукай", — лічыць Усманава.
У экспазіцыі прынялі ўдзел маладыя беларускія мастакі і даследчыкі, якія хочуць паказаць новы погляд на працы Барта. У адкрыцці выставы таксама ўдзельнічаў Сяргей Зенкін —літаратуразнаўца і культуролаг, які перакладаў тэксты Барта на рускую мову.
Працягнецца выстава "Ралан Барт. Ключавыя словы" да 13 чэрвеня.
