МІНСК, 11 чэр — Sputnik. Ініцыятарам правядзення мерапрыемства выступіў клуб гістарычнай рэканструкцыі "Гівойт".
Мэта мерапрыемства — пагружэнне ў гісторыю заходнееўрапейскага і беларускага Сярэднявечча: гістарычная рэканструкцыя паходнага побыту, турніраў і бітваў рыцараў.
"Асаблівасцю гэтага фестывалю ў адрозненні ад большасці іншых гістарычных рыцарскіх рэканструкцый будзе турнір алебардзістаў і конных лучнікаў", — распавёў карэспандэнту Sputnik арганізатар мерапрыемства, кіраўнік рыцарскага клуба "Гівойт" Уладзімір Лічко.
Наведвальнікі фестывалю змогуць пабачыць конны турнір, турнір пешых рыцараў, дзе воіны будуць змагацца адзін на адзін, а таксама масавыя спаборніцтвы —бугурты, у якіх супрацьстаялыя бакі будуць імкнуцца да захопу "караля" і сцяга і камандныя баі 5x5.
На мерапрыемстве будуць працаваць і інтэрактыўныя пляцоўкі, дзе ўсе ахвочыя змогуць вывучыцца сярэднявечным танцам Еўропы і ВкЛ, пастраляць з старадаўніх лукаў па мішэнях з розных дыстанцый.
Фестываль будзе суправаджацца музыкай эпохі сярэднявечча. Дакладнага спісу калектываў, якія будуць граць на старажытных музычных інструментах пакуль няма, але вядома, што сярод іх будуць гурты Lity Taler і "Адарвірог".
Вядучы мерапрыемства — гісторык, адзін з заснавальнікаў руху гістарычнай рэканструкцыі ў Беларусі Юрый Усціновіч.
Падрабязную інфармацыю пра "Эпоху рыцарства" можна паглядзець на адмысловым сайце мерапрыемства.
