ГОМЕЛЬ, 24 чэр — Sputnik. Нягледзячы на істотнае зніжэнне тавараабароту з-за крызіснай сітуацыі на Украіне, беларуска-ўкраінскае эканамічнае супрацоўніцтва не спыняецца. Па ініцыятыве ўкраінскіх бізнесменаў у Гомельскай вобласці да 2016 года адкрыюцца пяць новых прадпрыемстваў, паведаміў віцэ-губернатар Баляслаў Пірштук.
Украіна з'яўляецца другім знешнегандлёвым партнёрам рэгіёну пасля Расіі. Аднак за апошні год беларуска-ўкраінскі тавараабарот істотна скараціўся.
"Мы прыстойна страцілі ў тавараабароце. Некаторыя таварныя групы наогул не праходзяць", — заявіў журналістам у аўторак Пірштук.
Пры гэтым, паводле яго слоў, у крызіснай сітуацыі, якая зараз склалася, украінскі бізнэс праяўляе да супрацоўніцтва з беларускімі рэгіёнамі большую цікавасць, чым "мы да яго".
Намеснік старшыні Гомельскага аблвыканкама па эканамічных пытаннях паведаміў, што да 2016 года ў рэгіёне па ініцыятыве ўкраінскага боку будуць адкрыты пяць новых прадпрыемстваў.
"Нягледзячы на тое, што дзеецца ў краіне, украінцы збожжавыя, тую ж кукурузу, не паспяваюць перапрацоўваць і прадаваць", — растлумачыў Пірштук.
Таму, па яго словах, украінскі бізнес спрабуе стварыць вытворчасць у "спакойнай Беларусі". Са свайго боку, гомельскі рэгіён зацікаўлены не толькі ў новых працоўных месцах, але і ў тым, каб прадукты перапрацоўкі, якія падыходзяць для фарміравання кармавой базы буйной рагатай жывёлы, заставаліся ў рэспубліцы.
