МІНСК, 23 ліп — Sputnik. Супрацоўнікі Міністэрства па надзвычайных сітуацыях Беларусі ў суботу 25 ліпеня будуць адзначаць сваё прафесійнае свята — Дзень пажарнай службы: у Мінску пажарныя пройдуць парадам, пакажуць спецтэхніку і накормяць жыхароў сталіцы кашай.
Сёлета Дзень пажарнай службы адзначаецца ўжо ў 162-ы раз, урачыстыя мерапрыемствы запланаваны не толькі ў сталіцы, але і па ўсёй краіне.
"У Мінску свята стартуе ў 11:00 на Плошчы Перамогі, пасля чаго святкавання перанясуцца ў Парк Горкага", — сказалі Sputnik ў Мінскім гарадскім УМНС.
Па словах ратавальнікаў, спачатку адбудзецца ўскладанне кветак да манумента Перамогі кіраўніцтвам міністэрства, ветэранамі пажарнай службы і ганаровымі гасцямі.
Затым па праспекце Незалежнасці — ад будынка Белдзяржцырка да плошчы Перамогі — пройдзе ўрачысты парад, падчас якога гледачы ўбачаць ратавальнікаў у форме розных часоў, гістарычную і сучасную тэхніку.
Ва ўпраўленні паведамілі, што пасля параду свята працягнецца ў Парку Горкага: там адбудзецца пляц-канцэрт узвода ганаровай варты, парад плаўсродкаў МНС і выступленне духавых аркестраў.
"Кожны, хто прыйшоў зможа выпрабаваць тэхніку і пажарна-тэхнічнае ўзбраенне ратавальнікаў: прымерыць баявую форму, пракаціцца на тэхніцы і нават пастраляць з пажарнага ствала", — сказалі ў МНС.
Там таксама паведамілі, што ў парку запланаваны канцэрт, конкурсы і спартыўна-забаўляльныя мерапрыемствы, а мінчане змогуць паспрабаваць на свяце кашу, прыгатаваную ратавальнікамі ў паходных кухнях.
