МІНСК, 25 ліп — Sputnik, Яўген Казарцаў. Экаабаронцы выступаюць супраць праекту новага ляснога кодэкса, які рыхтуецца да разгляду ў другім чытанні Палаты прадстаўнікоў восенню бягучага года.
Дзеючы кодэкс ўступіў у сілу ў 2000 годзе. З тых часоў, ўпэўнены заканадаўцы, з'явілася неабходнасць удасканаліць нормы дакумента. У 2014 годзе праект новага кодэкса быў прадстаўлены ў Палату прадстаўнікоў і ўхвалены дэпутатамі. Аднак эколагі б'юць трывогу: змены, на іх думку, будуць задавальняць патрэбы прамыслоўцаў і зусім не ўлічваюць неабходнасць абароны прыродных рэсурсаў.
Страсці вакол лясоў
Змяніць праект кодэкса патрабуюць адразу некалькі арганізацый: таварыства "Зялёная сетка", грамадскія аб'яднанні "Ахова птушак Бацькаўшчыны" і "Багна". Эколагі прапануюць падпісаць анлайн-петыцыю, якая пасля будзе перададзена ў Адміністрацыю прэзідэнта, старшыні Палаты прадстаўнікоў Нацсходу Уладзіміру Андрэйчанку і старшыні Савета Рэспублікі Міхаілу Мясніковічу.
"Змены, прадугледжаныя новым Лясным кодэксам, акажуць істотны ўплыў на навакольнае асяроддзе. А прыняцце новага праекта кодэкса паставіць пад пагрозу найбольш каштоўную частку ляснога фонду Беларусі ва ўгоду імгненным эканамічным інтарэсам", — заявілі экаабаронцы.
За два месяцы петыцыю падпісалі амаль 12 тысяч чалавек пры неабходных 15 тысячах.
"Здабываць драўніну можна, не наносячы вялікай шкоды біяразнастайнасці лясоў, іх колькасці і якасці", — сцвярджаюць актывісты і заклікаюць вярнуць праект Ляснога кодэкса на дапрацоўку.
Чым дрэнны новы праект?
Эколагі звяртаюць увагу на недапушчальнасць некаторых аспектаў дакумента. Напрыклад, іх не задавальняе рэзкае павелічэнне долі эксплуатаваных лясоў, скарачэнне долі ахоўных лясоў, якая ўзнікла магчымасць высечкі і забудовы большай частцы цяперашніх прыгарадных лясных тэрыторый.
Паводле новага праекту плошча лясоў першай групы (з ахоўнымі функцыямі і лясы асабліва ахоўных прыродных тэрыторый) скароціцца на 325,1 тысячы гектараў, а разліковая лесасека па краіне павялічыцца на 437,9 тысячы кубічных метраў. Таксама ў рэдакцыі кодэкса прапануецца паменшыць шырыню ахоўных палос лесу ўздоўж чыгуначных ліній і рэспубліканскіх аўтамабільных дарог да 100 метраў у кожны бок. Паводле дзеючага кодэксу ўсталяваная неабходнасць ахоўных палос лесу ўздоўж чыгуначных ліній шырынёй да 500 метраў у кожны бок і рэспубліканскіх аўтадарог — да 250 метраў. Заканадаўцы ўпэўнены: гэтыя новаўвядзенні дапамогуць рацыянальна выкарыстоўваць лясныя рэсурсы. Цяпер плошча лясоў, дзе няма абмежаванняў на высечку, павялічваецца з 50% да 70-80% ад агульнай плошчы ў краіне.
Эколагі запэўніваюць: з такімі нормамі можна будзе высякаць і запаведнікі рэспублікі.
Заднім днём?
Праект новага Ляснога кодэкса распрацоўвалі на працягу мінулага года. Яго прынялі ў першым чытанні ў Палаце прадстаўнікоў, а потым дадалі значныя змены. У экаахоўных арганізацыях здзіўляюцца: у палаце змены аргументавалі узгадненнем з грамадскасцю, але ў арганізацыях пра іх нічога не чулі.
Аўтары петыцыі патрабуюць грамадскае абмеркаванне праекта, якое павінна доўжыцца не менш за месяц.
Зрэшты, у Міністэрстве лясной гаспадаркі не бачаць нічога дрэннага ў новым праекце. "Ніхто вакол гарадоў не збіраецца высякаць лясы і тым больш аддаваць лясныя тэрыторыі пад забудову", — заяўляў раней першы намеснік міністра лясной гаспадаркі Аляксандр Кулік.
