МІНСК, 4 вер — Sputnik, Любоў Каспяровіч. Новы навучальны год БДУІР, БНТУ, БДАТУ, БДТУ, БДМУ і БДЭУ распачалі з памылкай на сваіх шыльдах, паведамляе карэспандэнт Sputnik.
Новы правапіс беларускай арфаграфіі і пунктуацыі пачаў дзейнічаць у 2010 годзе. На яго засваенне грамадскасць мела два гады. Адна з найбольш прыкметных змен — пашыранае ўжыванне "у" нескладовага. Найперш гэты пункт датычыўся слоў іншамоўнага паходжання.
Як універсітэты Мінска засвоілі гэтае правіла, Sputnik даведаўся на ўласныя вочы.
Сярод дзевяці вну, да дзвярэй якіх мы трапілі, толькі тры мелі правільнае напісанне. Гэта Мінскі дзяржаўны лінгвістычны ўніверсітэт (МДЛУ), Беларускі дзяржаўны ўніверсітэт (БДУ) і Беларускі дзяржаўны педагагічны ўніверсітэт імя Максіма Танка (БДПУ). Праўда, здалёк штрых над літарай выглядае невыразна.
Вышэйшыя навучальныя ўстановы тэхнічнага, эканамічнага і медыцынскага накірункаў пакуль не прыдзялілі гэтай змене ніякай увагі. Шыльды на сцянах Беларускага дзяржаўнага ўніверсітэта інфарматыкі і радыёэлектронікі (БДУІР), Беларускага нацыянальнага тэхнічнага ўніверсітэта (БНТУ), Беларускага дзяржаўнага аграрнага тэхнічнага ўніверсітэта (БДАТУ), Беларускага дзяржаўнага тэхналагічнага ўніверсітэта (БДТУ), Беларускага дзяржаўнага медыцынскага ўніверсітэта (БДМУ) і Беларускага дзяржаўнага эканамічнага ўніверсітэта (БДЭУ) не адпавядаюць новаму правапісу беларускай мовы: слова "ўніверсітэт" пачынаецца са звычайнай "у".
