Trubetskoy і Brutto у гадавіну распаду прэзентавалі па кліпу ў гонар канчатковага развітання адзін з адным.
Доўгая эпапея з развалам культавага гурта скончылася ў вышэйшай ступені паэтычна: фронтмэн Trubetskoy Павел Булатнікаў развітаўся з Міхалком кліпам на песню "Завяршаецца гульня". Міхалок адказаў тым жа рэверансам і прэзентаваў цізер новага кліпа, ад імя Brutto паабяцаўшы, што" і далей працаваць у іміджы Агніі Барто" не збіраецца.
Сімвалічна, што развітальны кліп для Trubetskoy напісаў удзельнік першага саставу "Ляпіса Трубецкога" Аляксандр Ролаў — агульны сябар Міхалка і Булатнікава. Відэа зняў Аляксей Церахаў, аўтар самых значных кліпаў гурта — "Ау" і "Воины света". У кастрычніку гурт прэзентуе новы альбом, які будзе складацца толькі з новых кампазіцый. У першай палове лістапада мінчане могуць чакаць канцэртную прэзентацыю рэлізу.
Міхалок, якога цягам году былыя прыхільнікі вінавацілі ў наўмысна прымітыўных тэкстах першага альбома Brutto, паабяцаў, што наступны альбом будзе прысвечаны "пераасэнсаванню паняцця "рэвалюцыя".
"Больш ніякіх "гантэлей" і прымітыўных рыфмаў кшталту "грач-мяч ", — заявіў фронтмэн.
Напярэдадні выхаду альбома Brutto прэзентавалі цізер да новага кліпу "Родны край".
Пра перспектывы Brutto і пра новы кліп Trubetskoy карэспандэнт Sputnik пагаварыў з музычным журналістам Аляксандрам Чарнухам.
"Праз год музыкі Trubetskoy, нарэшце, зразумелі, што канцэпцыя групы-кавербэнда, якая выязджае за кошт ляпісаўскага рэпертуару, нежыццяздольная", — адзначыў ён. Да таго ж, па яго словах, як бы дзіўна гэта ні гучала, у Мінску і без таго даволі кавербэндаў, якія граюць песні "Ляпісаў" лепш, чым гэта робіць Trubetskoy.
"У мяне няма асаблівай веры ва ўласны рэпертуар групы Булатнікава, тое, што я чуў, мне не спадабалася, не ведаю, што павінна змяніцца ў іх развіцці, каб ім удалося стаць цікавым калектывам", — падкрэсліў суразмоўца Sputnik.
Зрэшты, Чарнуха прызнае, што Trubetskoy усё яшчэ збірае пляцоўкі, а над калектывам працуе каманда прафесіяналаў — Зміцер Безкаравайны, Яўген Калмыкоў. "І самі музыкі таленавітыя па-свойму. Але канчатковы прадукт відавочна слабы. Музыкі кажуць, што хочуць граць рок-н-рол, а выходзіць папса", — растлумачыў Чарнуха.
Эксперт параўнаў кліпы ад Trubetskoy і Brutto.
"У Булатнікава кліп атрымаўся добрым — мілы настальгічны сцёб, але было б крута, калі б ён выйшаў год таму. Бо ўсе мы, ацэньваючы Trubetskoy, будзем азірацца на Міхалка, які выпускае ўжо другі альбом", — сказаў ён.
Самога Міхалка і яго новы гурт пасля першага альбома, па словах Чарнухі, ніхто не ўспрымаў сур'ёзна. Але новы, адкрыта ўдалы, па ацэнцы эксперта, кліп на песню "Родны край" зноў прадэманстраваў, што Міхалок — "чалавек не дурны", які ўмее накіроўваць інфармацыйныя патокі так, як яму трэба.
"Аўтарытэт спевака рэвалюцыі Міхалок не губляў нават пасля першага альбома, ён стварае ўдалыя інфаповады і таму яму не трэба рэабілітавацца за песні пра гіры", — рэзюмаваў суразмоўца Sputnik.
