МІНСК, 17 вер — Sputnik. Усе візавыя цэнтры ў Беларусі ў чацвер па-ранейшаму часова не прымаюць кліентаў, паведамілі Sputnik на інфалініі Візавага цэнтра Літвы ў Мінску.
У Беларусі ў сераду ўсе візавыя цэнтры часова спынілі сваю працу ў сувязі з уступленнем у сілу з 16 верасня новых правілаў правядзення валютных аперацый, зацверджаных Нацыянальным банкам. У адпаведнасці з гэтымі правіламі ўсе пасрэдніцкія структуры не маюць права прымаць ад кліентаў консульскі збор у валюце, як гэта было раней. Зараз усе разлікі павінны ажыццяўляцца ў беларускіх рублях.
"На дадзены момант усе візавыя цэнтры ў Беларусі дакументы ад кліентаў па-ранейшаму не прымаюць, дакладнай інфармацыі аб тым, калі адновіцца праца, няма", — паведаміў прадстаўнік літоўскага Візавага цэнтра.
Паводле яго слоў, тлумачэнні ад консульскіх устаноў аб тым, як працаваць па новых правілах Нацбанка, візавымі цэнтрамі да гэтага часу не атрыманы.
У той жа час у цэнтры паведамілі, што кліенты, якія падалі дакументы на атрыманне віз да 16 верасня, могуць бесперашкодна іх атрымаць. "Гэтых грамадзян прыпыненне працы не тычыцца, яны могуць прыйсці і атрымаць свае дакументы. Усе нашы кабінеты адкрыты, усе работнікі знаходзяцца на сваіх месцах. Мы проста не прымаем новыя заявы", — падкрэсліў супрацоўнік цэнтра.
Між тым, у Нацбанку заявілі, што не бачаць ніякіх перашкод для паўнавартаснай працы візавых цэнтраў.
"Тым, хто апынуўся не гатовы да працы ў новых умовах, хацелася б нагадаць, што валютнае заканадаўства Рэспублікі Беларусь не ўтрымлівае абмежаванняў для візавых цэнтраў па куплі замежнай валюты для выканання сваіх абавязацельстваў перад замежнымі пасольствамі. Гэта значыць, ніякіх аб'ектыўных перашкодаў для паўнавартаснай працы дадзеных юрыдычных асоб сёння няма", — падкрэсліў начальнік галоўнага ўпраўлення валютнага рэгулявання і валютнага кантролю Нацбанка Анатоль Мароз. Яго словы цытуе БелТА.
Ён заўважыў, што да прыняцця НБРБ пастановы №515 візавыя цэнтры ўсталёўвалі кошты на свае паслугі ў валюце з пералікам па курсе Нацбанка на дату аплаты. Пры гэтым плата за візы бралася ў доларах ці ў еўра. Аднак, па словах Мароза, "беларускі рубель з'яўляецца законным плацежным сродкам, абавязковым да прыёму па намінальным кошце на ўсёй тэрыторыі Беларусі".
"Гэта азначае, што візавыя цэнтры і раней — да ўступлення ў сілу пастановы №515 — павінны былі прадугледжваць магчымасць аплаты за візы як у замежнай валюце, так і ў беларускіх рублях", — сказаў ён, заўважыўшы, што калі б гэта правіла выконвалася і раней, то ніякіх складанасцяў б не ўзнікла.
