МІНСК, 6 кас — Sputnik. Кіраўнік Цэнтрвыбаркама Беларусі Лідзія Ярмошына лічыць, што фінансаванне перадвыбарных кампаній у прэзідэнты праз асабістыя фонды кандыдатаў прыжываецца ў рэспубліцы.
Новаўвядзеннем прэзідэнцкай гонкі 2015 стала фінансаванне агітацыйных кампаній кандыдатаў не з бюджэту, а за кошт асабістых фондаў, якія фарміруюцца з добраахвотных ахвяраванняў фізічных і юрыдычных асоб.
"Прыемна бачыць, што дадзеная форма фінансавання прыжываецца ў нас у краіне і хутка стане звыклай. Мы ўсё больш сыходзім ад бюджэтнага фінансавання перадвыбарчай агітацыі", — заявіла Ярмошына падчас свайго чарговага відэазвароту.
Кіраўнік ЦВК выказала ўпэўненасць, што "мы пераходзім на сучасныя дэмакратычныя нормы фінансавання выбараў" і падкрэсліла, што выбарчая кампанія "праходзіць на высокім узроўні".
"Дэмакратычныя працэдуры становяцца выразнымі і добра ўспрымаюцца ўсімі выбаршчыкамі", — сказала яна.
Распавяла Ярмошына і аб ходзе агітацыі. Паводле яе слоў, за час кампаніі прайшло больш за 500 мерапрыемстваў у закрытых памяшканнях, большую частку з якіх правялі давераныя асобы дзеючага прэзідэнта Аляксандра Лукашэнкі.
Акрамя таго, было праведзена звыш 300 пікетаў і іншых вулічных мерапрыемстваў, тут кіраўнік ЦВК адзначыла групы лідэра ЛДП (Б) Сяргея Гайдукевіча і Лукашэнкі.
Датэрміновае галасаванне стартавала ў Беларусі ў аўторак. Асноўны дзень галасавання на прэзідэнцкіх выбарах рэспублікі — 11 кастрычніка.
