Мінск, 2 ліст — Sputnik. Беларускі Пэн-цэнтр абвясціў чарговы набор у рэзідэнцыю маладога пісьменніка ў Вільні. Праграма дае магчымасць творцу ва ўзросце да 35 гадоў два тыдні жыць у Доме правоў чалавека ў Вільні і займацца літаратурнай работай. Пад літаратурнай работай маюць на ўвазе прозу, паэзію, пераклады, крытыку. Каб паўдзельнічаць у праграме, трэба падаць заяўку на сайце цэнтра.
Першым з беларускіх паэтаў у рэзідэнцыю патрапіў Антон Рудак яшчэ ў лютым 2014. Усяго за амаль два гады гасцінасці Дом правоў чалавека прыняў да сабе трынаццаць паэтаў, празаікаў, перакладчыкаў і крытыкаў. Апошнія выпускнікі вярнуліся з Вільні ў верасні гэтага году — паэтка Кацярына Зыкава і празаік Кірыл Дубоўскі.
Успамінаючы рэзідэнцыю, Кацярына расказвае, што там вырашыла спрабаваць сябе не толькі ў паэзіі, але ж і ў прозе.
"Начамі ў Рэзідэнцыі было страшна. Здавалася, па калідорах блукае нешта і зараз пастукае ў дзверы. Асабліва палохаў ксеракс на другім паверсе — часам у цемры ён свяціўся і стагнаў. У адмыслова страшныя моманты я глядзела які-небудзь вельмі дрэнны серыял і імгненна засынала ад злосці і раздражнення", — успамінае Кацярына. Адным словам, акрамя ксеракса, усё ў рэзідэнцыі падаецца ідэальным для стварэння якога-ніякага шэдэўра.
