МІНСК, 9 ліс — Sputnik. Легендарны рух, які некалі зрабіў сапраўдную рэвалюцыю ў беларускай літаратуры, адзначае сваё 20-годзьдзе.
Сёння Бум-Бам-Літ успрымаецца перадусім як легенда 90-ых, якую даўно ўжо прэпарыруюць літаратуразнаўцы і студэнты. Рух зрабіў сваю справу — пазбавіў айчыннае прыгожае пісьменства звыклай для яго эстэтычнай цнатлівасці і паспяхова сканаў яшчэ ў 1999 годзе.
Але колішнія "зрухары", на шчасце, пакуль жывыя — ва ўсіх сэнсах слова. Таму 13 лістапада абяцаюць зусім не мемарыяльную "сустрэчу вэтэранаў", але цалкам сучасную літаратурную імпрэзу. Арганізатары, прынамсі, кажуць пра шалёны кактэйль словаў, музыкі, віскату, шуму, ляманту, жэстаў, відэаэфэктаў.
