МІНСК, ліс 10 — Sputnik. Ініцыятары праекта MovaCup.BY плануюць web-пляцоўку, дзе кожны зможа паспрабаваць свае сілы ў інтэлектуальных спаборніцтвах па валоданню беларускай мовай, а таксама ведах гісторыі ды культуры Беларусі.
Карыстальнік можа абраць адзін з двух модуляў.
Першы модуль прадугледжвае пераклад слоў з рускай мовы на беларускую ў выглядзе футбольнага матчу.
Карыстальнік абірае ўзровень складанасці і пачынае гульню. Каб "забіць гол", патрэбна прайсці тры лініі абароны ды брамніка, іншымі словамі — зрабіць пераклад чатырох слоў на беларускую мову. Супернік-камп'ютар робіць тое ж самае ў выпадку няўдалай атакі альбо пасля "гола".
Гульня абмежаваная 5-цю хвілінамі; час, які даецца для перакладу — 10 секунд.
Чым вышэй узровень складанасці, абраны гульцом, тым больш балаў для свайго рэйтынга ён можа здабыць. Але ж і тым складаней будуць словы для перакладу і супернік-камп'ютар.
Другі модуль вызначыць лепшага знаўца гісторыі ды культуры Беларусі ў жанры гульні "Веру/Не веру".
Карыстальнік бачыць перад сабой таблічку з выкладзеным на ёй гістарычным ці культурным фактам, пасля чаго ён павінен адказаць, сапраўдны гэта факт ці не. За кожны правільны адказ гулец атрымлівае рэйтынгавыя балы.
