МІНСК, 29 сту — Sputnik. Дачка прэзідэнта Казахстана Нурсултана Назарбаева Алія зняла фільм у Беларусі, паведамляе інфармацыйнае агенцтва "Новости-Казахстан".
Карціна пад назвай "Дарога да маці" прысвечана 70-годдзю перамогі ў Вялікай Айчыннай вайне. Алія Назарбаева выступіла генеральным прадзюсарам кінакарціны, здымкі якой адбываліся ў трох краінах: Беларусі, Казахстане і Азербайджане.
Сюжэт фільма ахоплівае некалькі складаных гістарычных перыядаў жыцця народа Казахстана. Гэта эпоха калектывізацыі, ваенныя і пасляваенныя гады. У цэнтры падзей аповяд пра лёс чалавека, які прайшоў праз усе выпрабаванні — дзіцячы дом, суровая вайна, лагер для зняволеных.
У некаторых батальных сцэнах, якія здымаліся ў Беларусі, было задзейнічана больш за 500 чалавек масоўкі, 300 адзінак баявой зброі.
У шырокі пракат фільм, здымкі якога скончыліся ў чэрвені мінулага года, выйдзе ў гэтым годзе. Кінакарціна ўдзельнічала ў шэрагу кінафэстаў.
