МІНСК, 17 лют — Sputnik. Пабачыць дзікіх жывёлаў у натуральным асяроддзі зноў можна ў Нацыянальным парку "Белавежская пушча".
"У мэтах паляпшэння турыстычнага сэрвісу і пашырэння сферы паслуг у Нацыянальным парку "Белавежская пушча" зноў уведзены ў дзеянне экалагічны тур "Свет дзікай прыроды", — распавядаюць у адміністрацыі парка.
Падчас гэтага падарожжа наведвальнікі Нацыянальнага парка змогуць палюбавацца запаведнай дзікай прыродай, надзвычай багатым раслінным светам старажытнай пушчы.
Экскурсія праводзіцца ў ранішнія і вячэрнія гадзіны, калі жывёлы выходзяць на кармленне з лясных чашчаў на адкрытую мясцовасць. Аматары дзікай прыроды змогуць не толькі ўбачыць іх, але і сфатаграфаваць.
Тэрыторыя Нацыянальнага парка падзелена дзяржаўнай мяжой на дзве часткі — беларускую і польскую. На тэрыторыі польскай часткі пушчы знаходзіцца Белавежскі нацыянальны парк, плошча якога складае 10 502 га і землі Дзяржаўных лясоў Польшчы. У беларускай частцы пушчы і на прылеглых землях створана Дзяржаўная прыродаахоўная ўстанова "Нацыянальны парк "Белавежская пушча" плошчай у 150 069 га. Гэта адзін з буйнейшых лясных масіваў Еўропы.
