МІНСК, 22 лют — Sputnik. Прэзідэнт Беларусі Аляксандр Лукашэнка даручыў Камітэту дзяржаўнага кантролю правесці рэвізію тарыфаў на грамадскі транспарт і пасажырскія перавозкі чыгуначным і аўтамабільным транспартам.
У снежні ў Беларусі павысіўся кошт праезду на ўсіх відах пасажырскага транспарту.
"Упэўнены, што мы там знойдзем рэзервы. У тым плане, што тарыфы ў сябе ўвабралі і нейкія невытворчыя, іншыя выдаткі, якіх там не павінна быць. Паглядзім, які працэнт насельніцтва кампенсуе ад рэальных выдаткаў, паглядзім на гэтыя выдаткі. Трэба правесці рэвізію гэтых тарыфаў", — сказаў Лукашэнка перад тым, як заслухаць даклад аб падатковай і акцызнай палітыцы ў 2016 годзе.
Лукашэнка падкрэсліў, што праезд у грамадскім транспарце ў папярэдні раз даражэў у снежні мінулага года, і з тых часоў дабрабыт беларусаў не палепшыўся.
"Што змянілася? Народ разбагацеў, што мы сёння павысім тарыфы чыгуначныя, прыгарадныя перавозкі ці гарадскім транспартам?" — цытуе словы прэзідэнта БелТА.
Лукашэнка падкрэсліў, што не збіраецца ўхваляць непапулярныя меры, якія прывядуць да пагаршэння матэрыяльнага становішча грамадзян.
"Ніякага з майго боку адабрэння так званых непапулярных мер, якія сёння яшчэ раз удараць па насельніцтве, не будзе", — сказаў ён.
