Mitsubishi могуць канфіскаваць у беларуса за 340 пачкаў цыгарэт

Падпісацца
Памежнікі канстатуюць, што ў апошні час кантрабанда тытунёвых вырабаў на мяжы Беларусі і Літвы набыла эпідэмічны характар.

МІНСК, 11 сак — Sputnik. Супрацоўнікі Лідскага пагранатрада затрымалі на беларуска-літоўскім памежжы мужчыну, які спрабаваў вывезці ў Літву 340 пачкаў цыгарэт — аўтамабіль парушальніка можа быць канфіскаваны, паведамілі Sputnik ў пагранатрадзе.

Па словах памежнікаў, кантрабанда тытунёвых вырабаў на мяжы Беларусі і Літвы ў апошні час набыла эпідэмічны характар.

"Раніцай 10 сакавіка падчас рэалізацыі першаснай інфармацыі ў чарговы раз зрабілі спробу вывазу партыі тытунёвых вырабаў за межы Беларусі ў пункце пропуску "Беняконі". У выніку дагляду аўтамабіля Mitsubishi, які належыць 41-гадоваму беларусу, з тайніка было вынята 340 пачкаў цыгарэт", — сказалі ў атрадзе.

Памежнікі таксама паведамілі, што нелегальны груз ацанілі ў 7,48 мільёна рублёў.

"Тытунёвыя вырабы знаходзіліся ў адмысловым тайніку — саматужна вырабленай металічнай ёмістасці, размешчанай у панэлі прыбораў", — сказалі суразмоўцы агенцтва.

Там таксама падкрэслілі, што дзеючае заканадаўства прадугледжвае не толькі штраф і канфіскацыю кантрабандных тавараў, але і канфіскацыю машыны як прылады здзяйснення правапарушэння.

"Хутчэй за ўсё, па рашэнні суда затрыманая аўтамашына будзе канфіскавана і накіравана ў даход дзяржавы", — заключылі пагранічнікі.

Стужка навiн
0