МІНСК, 18 сак — Sputnik. Больш за 110 дзяцей, якія знаходзіліся на рэабілітацыі ў Рэспубліканскім дзіцячым пульманалагічным цэнтры медыцынскай рэабілітацыі (Мядзельскі раён Мінскай вобласці), былі перавезены з установы ў размешчаны побач санаторый "Журавушка" з-за павышанага ўзроўню пароў ртуці ў цэнтры, паведамілі Sputnik у Мінскім абласным УМНС.
Напярэдадні раніцай падчас вымярэння тэмпературы ў адным з памяшканняў выпадкова разбілі ртутны тэрмометр. У пакоі, дзе гэта адбылося, ратавальнікі правялі дэмеркурызацыйныя працы, а спецыялісты цэнтра гігіены, эпідэміялогіі і грамадскага здароўя правялі замеры гранічна дапушчальнай канцэнтрацыі пары ртуці.
"Паколькі нязначнае перавышэнне дапушчальнай канцэнтрацыі было выяўлена і ў фае, каб выключыць пагрозу здароўю юных пацыентаў, было прынята рашэнне часова размясціць 111 дзяцей у "Журавушка", — сказалі ў МНС.
Ва ўпраўленні таксама адзначылі, што пацярпелых у выніку здарэння няма, дзеці на пагаршэнне здароўя не скардзіліся.
Паводле інфармацыі МНС, дзеці павінны былі правесці ў цэнтры яшчэ тыдзень, Міністэрства аховы здароўя прыняло рашэнне даць ім магчымасць прайсці дадатковы курс лячэння ў жніўні. Ратавальнікі таксама паведамілі, што для падстрахоўкі спецыялісты правядуць поўную дэмеркурызацыю корпуса медцэнтра.
