МІНСК, 6 кра — Sputnik. Блогер з Мінска пад нікам uxmuander апублікаваў у сваім ЖЖ фатаграфію новага насельніка сталічнага парку Горкага — андатры.Паводле інфармацыі блогера, многія мінчане ўжо заўважылі новага звярка і пачалі яго падкормліваць.
"Пад пешаходным мастком над каналам пасялілася дзіцяня воднага пацука — андатры. Я спачатку падумаў, што гэта бабёр, але хвост не плоскі, ды і апошнія "таварышы" больш агрэсіўныя і палахлівыя. Гэты ж індывід, нягледзячы на пільную ўвагу публікі, паводзіў сябе, як сапраўдная "зорка": пазіраваў, з удзячнасцю прымаў пачастунак, не дапускаў да "кармавой базы" канкурэнтаў — качак ды варон", — напісаў блогер.
Андатры звычайна месцяцца ля рэчак — яны жывуць там у норках. І мінская асобіна не стала выключэннем — яна жыве ў Свіслачы.
Заолагі адзначаюць, што андатра — міралюбная і бяспечная жывёла і выжыць у сталічным парку яна здолее. Харчаванне для звярка знойдзецца, а яго жыццю тут нічога не пагражае.
