МІНСК, 15 кра — Sputnik. Дзяржаўны дэпартамент ЗША апублікаваў даклад па сітуацыі з правамі чалавека ў Беларусі, падрыхтаваны Бюро дэмакратыі, правоў чалавека і працы (Bureau of Democracy, Human Rights and Labor).
Спецыялісты падрыхтавалі даклад па сітуацыі з правамі і свабодамі ў рэспубліцы за мінулы год. На іх думку, сітуацыя ў беларускім грамадстве кардынальна не змянілася ў параўнанні з папярэднімі гадамі.
Заходнія эксперты пералічваюць праблемы з дэмакратыяй у Беларусі на 52-х старонках дакладу. Сярод прэтэнзій — нязменнасць улады, адсутнасць захавання правоў інвалідаў, этнічных і сэксуальных меншасцяў. Таксама паказваюць у Дзярждэпартаменце на адсутнасць незалежнага правасуддзя і нездавальняючыя нормы ўтрымання ў беларускіх турмах.
Умовы працы і аплата таксама не задавальняюць спецыялістаў — яны знаходзяць іх занадта нізкімі.
Асобны пункт прысвечаны і адсутнасці права на сход грамадзян — эксперты прыводзяць прыклад са шматлікімі штрафамі за несанкцыянаваныя акцыі ў сталіцы і рэгіёнах.
Нягледзячы на не суцяшальнае меркаванне амерыканскіх спецыялістаў, еўрапейскія палітыкі бачаць у Беларусі шлях да лібералізацыі і дэмакратызацыі. Пасля правядзення ў кастрычніку 2015 года прэзыдэнцкіх выбараў санкцыі ў дачыненні да кіраўніцтва і прадпрыемстваў рэспублікі былі прыпыненыя, а затым і зусім знятыя. Таксама Беларусь актывізавала дыялог з Еўрапейскім саюзам, які, па словах прадстаўнікоў афіцыйнай улады, "зразумеў, што на мове санкцый размаўляць бессэнсоўна і вырашыў весці канструктыўны дыялог".
