МІНСК, 21 кра — Sputnik. Зараз на тэрыторыях, забруджаных радыёнуклідамі, жыве 1 мільён 142 тысячы чалавек, тут размешчана 2193 населеныя пункты, распавёў на прэс-канферэнцыі, прысвечанай 30-годдзю катастрофы на Чарнобыльскай АЭС, першы намеснік начальніка Дэпартамента па ліквідацыі наступстваў катастрофы на ЧАЭС МНС Беларусі Анатоль Загорскі.
"Усе нашы дзеянні скіраваныя на тое, каб забяспечыць нармальныя і бяспечныя ўмовы жыццядзейнасці гэтых людзей і вырашыць праблемы, звязаныя не толькі з сацыяльнай, але і з радыяцыйнай абаронай", — заявіў Загорскі.
Намеснік кіраўніка дэпартамента распавёў, што ў гэтым годзе былі зацверджаны мерапрыемствы Дзяржаўнай праграмы пераадолення наступстваў катастрофы на 2011-2020 гады. Па словах Загорскага, на рэалізацыю гэтых мерапрыемстваў з дзяржбюджэту плануецца выдаткаваць 26 трыльёнаў рублёў.
Асноўныя выдаткі — каля 56% ад агульнай сумы — прадугледжаны на сацыяльную абарону насельніцтва. Гаворка ідзе пра аздараўленне, медыцынскае абследаванне і бясплатнае харчаванне дзяцей. Каля 20% сродкаў будуць накіраваны на ахоўныя мерапрыемствы ў сельскай гаспадарцы, яшчэ 22% на будаўніцтва газа-і вадаправодаў, бальніц, а таксама забеспячэнне жыллём інвалідаў, якія страцілі здароўе праз радыяцыю.
На навуковае даследаванне праблемаў наступства Чарнобыльскай катастрофы мяркуецца выдаткаваць да 1% ад усіх выдаткаваных на дзяржпраграму грошай.
"Галоўная выснова заключаецца ў тым, што наша дзяржава не памылілася ў выбары плана дзеянняў і забяспечыла радыяцыйную і сацыяльную абарону насельніцтва, якое апынуўся на забруджанай тэрыторыі. Вынік гэтай працы, а таксама набытыя вопыт і веды выклікаюць павагу не толькі ў суседзяў, Расіі і Украіны, але і выкарыстоўваюцца спецыялістамі многіх краін" — падкрэсліў Загорскі.
Праз 30 гадоў пасля катастрофы плошча забруджаных зямель скарацілася ў 1,7 разы, падкрэслілі спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя. Калі ў 1986 годзе пад забруджаныме цэзіем-137 падпалі каля 23% тэрыторыі Беларусі, то ў 2015 падвышанае ўтрыманне радыенуклідаў адзначалася на 13% беларускіх земляў.
Да 2046 года, паводле ацэнак радыёлагаў, колькасць "брудных" земляў павінна скараціцца да 10%.
