МІНСК, 2 мая — Sputnik. Х Міжнародная канферэнцыя "Аўтэнтычны фальклор: праблемы захавання, вывучэння, успрымання", прысвечаная памяці антраполага Зінаіды Мажэйкі, адбылася ў БДУКМ.
Апроч пленарнага і секцыйных пасяджэнняў, традыцыйных для навуковага форуму, на канферэнцыі была зладжана вялікая практычная частка. Адбыліся канцэрты аўтэнтычных і постфальклорных гуртоў з Беларусі, Літвы, Польшчы, Казахстана, праводзіліся майстар-класы музыкаў, танцораў, майстроў мастацтва вуснай традыцыі, у велікодную нядзелю адбылася рэканструкцыя валачобнага абраду беларусаў з абыходам вёскі, спевамі, гульнямі і танцамі ў музеі архітэктуры і побыту ў в. Азярцо.
На традыцыйным канцэрце у БДУКМ "Фальклор беларускай глыбінкі" выступілі аўтэнтычныя гурты з Гродзенскага, Воранаўскага, Ушацкага і Любанскага раёнаў.
Традыцыя правядзення канферэнцый, прысвечаных праблемам аховы і пераемнасці нематэрыяльнай культурнай спадчыны запачаткаваны у БДУКМ у 2007 годзе. Мэта навукова-практычных форумаў — комплекснае сістэмнае вывучэнне аўтэнтычнага фальклору і аналіз шляхоў яго інтэграцыі ў мастацкія і адукацыйныя рэаліі ХХІ стагоддзя.
