МІНСК, 13 мая — Sputnik. Гісторыка-культурны музей запаведнік "Нясвіж" запрашае ў гэтую суботу на "Ноч музеяў 2016", гасцей чакае сустрэча з трыма самымі яркімі прадстаўнікамі знакамітага літвінскай роду.
"Калі летась мы распавядалі гісторыю, абапіраючыся на жаночую лінію — у нас была праграма "Тры княгіні — тры эпохі", то сёлета мы зрабілі стаўку на самых знакамітых мужчын з роду Радзівілаў. Гасцей чакае сустрэча з заўзятым падарожнікам Хрыстафорам Радзівілам "Сіроткам", заступнікам тэатра Каралем Станіславам Радзівілам "Пане Каханку" і ваяром Антоніем Вільгельмам Радзівілам", — распавялі Sputnik ў музеі.
Князі будуць чакаць гасцей у замку, але каб з імі сустрэцца, наведвальнікам трэба прайсці адпаведныя выпрабаванні ў вонкавым дворыку замка.
Экзаменаваць будуць памочнікі князёў. Зрэшты, выпрабаванні будуць не занадта складанымі, каб з імі маглі справіцца і дамы, удакладнілі ў музеі.
Увечары, пасля ўсіх заданняў і інтэрактыўнай экскурсіі з удзелам князёў, гасцей Нясвіжскага замка чакае баль. Атмасферу палацавых лабірынтаў створаць артысты і салісты Музычнага Дома "Класіка", тэатр гістарычнага касцюма, рыцарскі клуб "Полацкі звяз", школа ірландскага танца "Глорыя" ды іншыя.
"Ноч музеяў" — міжнародная штогадовая акцыя, прысвечаная Дню музеяў, які адзначаецца 18 мая. Ідэя акцыі — даць наведвальнікам магчымасць убачыць звыклыя прасторы ў незвычайным рэжыме.
Беларускія музеі вырашылі змясціць праграмы, прысвечаныя прафесійнаму святу, на выходныя дні 14 і 21 мая.
