МІНСК, 13 мая — Sputnik. Міністр замежных спраў Літвы Лінас Лінкявічус падкрэсліў важнасць аднаўлення фінансавання Радай міністраў Паўночных краін Еўрапейскага гуманітарнага ўніверсітэта (ЕГУ), паведамілі Sputnik ў МЗС краіны.
Скандынаўскія краіны вырашылі спыніць падтрымку ЕГУ, каб перанакіраваць сродкі на бежанцаў. Таксама на рашэнне кіраўніцтва краін Паўночнай Еўропы паўплывалі скандалы вакол "беларускага універсітэта" і няўдалыя кіраўнічыя рашэнні.
"Ваша падтрымка і шматгадовы вопыт каардынатара донараў ЕГУ былі і застаюцца асабліва важнымі для універсітэта. Нягледзячы на тое, што сёлета Савет міністраў Паўночных краін не аказаў універсітэту фінансавай дапамогі, мы спадзяемся, што ваш папярэдні ўнёсак не знікне дарма і ў будучыні РМПК далучыцца да гэтага праекту, важнаму для ўсяго рэгіёну", — сказаў літоўскі міністр падчас тэлефоннай размовы з генеральным сакратаром Савета міністраў паўночных краін (СМСС) Дагфінам Хойбратэнам.
За дзесяць гадоў працы Віленскага ЕГУ каля 1500 беларускіх студэнтаў атрымалі ў Літве вышэйшую адукацыю. "Гэта паслядоўная і лепшая наша інвестыцыя ў развіццё ўзаемаразумення і ўмацаванне ўзаемаадносінаў Еўропы і Беларусі", — дадаў Лінкявічус.
Падтрымка ЕГУ з боку міжнародных донараў будзе працягвацца, а ролю каардынатара донараў возьме на сябе шведскае агенцтва па супрацоўніцтве ў галіне развіцця.
Таксама буйным фундатарам універсітэта з'яўляецца Еўракамісія.
ЕГУ пазіцыянуе сябе як беларуская ВНУ, хоць перастаў функцыянаваць у Мінску яшчэ ў 2004 годзе. Універсітэт працуе ў Вільні і фінансуецца за кошт Еўракамісіі і асобных краін Еўропы.
