МІНСК, 19 мая — Sputnik. ВУП Беларусі па выніках студзеня-красавіка 2016 года ў бягучых коштах склаў 293,1 трыльён рублёў і знізіўся на 3% у параўнанні з тым жа перыядам мінулага года, паведамілі Sputnik ў Нацыянальным статыстычным камітэце.
Для параўнання, па выніках першага квартала зніжэнне склала 3,6%, у студзені-лютым — 4%, у студзені рэцэсія дасягала 4,3%. Такім чынам, па выніках чатырох месяцаў можна казаць пра запавольванне тэмпаў рэцэсіі нацыянальнай эканомікі.
Па дадзеных дзяржстатыстыкі, у студзені-красавіку 2016 года ў прамысловасці спад склаў 2,5% (4,3% па выніках квартала і 5,6% у студзені-лютым). Пры гэтым асноўны прырост быў атрыманы ў красавіку — за мінулы месяц у параўнанні з красавіком 2015 года аб'ём прамысловай вытворчасці вырас на 2,9%.
Рознічны тавараабарот у студзені-красавіку 2016 года знізіўся на 1,1% (падзенне на 0,9% па выніках квартала), аптовы тавараабарот паказаў спад на 3,6% (спад на 4,5% па выніках квартала).
У сельскай гаспадарцы па выніках чатырох месяцаў быў дасягнуты рост на 1,5% (рост на 2% па выніках квартала).
У той жа час за чатыры месяцы бягучага года аб'ём грузаперавозак скараціўся на 9,9%, пасажырскія перавозкі знізіліся на 6,6%.
У мінулым годзе эканоміка Беларусі паказвала спад, пры гэтым з месяца ў месяц рэцэсія паглыблялася. Па выніках года падзенне ВУП склала 3,9%, пры тым што афіцыйны макропрогноз прадугледжваў рост не менш як на 0,2%. Мінэканомікі прагназавала, што па выніках года эканоміка Беларусі пакажа альбо нулявы прырост (пры спрыяльных знешніх умовах), альбо зніжэнне на 2-3%.
Згодна з прагнозам сацыяльна-эканамічнага развіцця Беларусі, прырост ВУП ў 2016 годзе павінен скласці 0,3%. Між тым міжнародныя фінансавыя інстытуты мяркуюць, што ў 2016 годзе ВУП Беларусі працягне зніжацца. У красавіку МВФ пагоршыў свой прагноз для беларускай эканомікі.
Сусветны банк і МВФ чакаюць аднаўлення эканомікі Беларусі не раней 2017 года, але пры ўмове правядзення ў краіне макраэканамічных рэформаў.
