МІНСК, 20 мая — Sputnik. Другі фестываль кастам культуры "Recast Moto Fest" пройдзе ў суботу на тэрыторыі мінскага завода "Мотавела". Чакаецца, што свае лепшыя праекты ў Мінск прывязуць майстры з розных куткоў Беларусі, а таксама Украіны і Расіі.
"Кастамные матацыклы адрозніваюцца ад звычайных тым, што кожны з іх мае унікальны дызайн. Прычым гаворка ідзе не толькі пра афарбоўку. Часта майстры істотна перарабляюць і саму канструкцыю, каб у выніку атрымаўся ўнікальны адзіны ў свеце матацыкл або ровар", — растлумачылі Sputnik арганізатары.
У праграме фэсту таксама тэст-драйвы мота- і велатэхнікі, шмат ежы і музыкі, выстава рэтра матацыклаў і іншых экспанатаў з музея айчыннага вытворцы.
Першы фестываль "Recast Moto Fest" ў 2015 годзе наведалі амаль 3000 чалавек, у гэтым годзе арганізатары істотна папрацавалі над праграмай і разлічваюць на яшчэ большую ўвагу гасцей.
