МІНСК, 25 мая — Sputnik. Музей авіяцыйнай тэхнікі, размешчаны ў пасёлку Баравая, запрашае валанцёраў, якія дапамаглі б прывесці ў парадак тэхніку пасля зімы. У прыватнасці, трэба вымыць самалёты.
"Штат музея невялікі, самі спраўляюцца з цяжкасцю. Некалькі гадоў таму, мы, фатографы і валанцёры з ліку курсантаў авіяцыйнай акадэміі, ужо ладзілі такую акцыю. У 2014 годзе ДТСААФ адзначаў юбілей, у аэраклуб прыязджаў прэзідэнт, таму тэхніку рыхтавалі спецыялісты і наша дапамога не спатрэбілася. А ў гэтым нас зноў чакаюць", — распавёў Sputnik адзін з арганізатараў акцыі фатограф Аляксей Ільін.
Першапачаткова ў фатографаў, паводле яго слоў, быў прафесійны інтарэс — зрабіць прыгожыя здымкі ў абмен на добрую справу. Гэтым разам яны падключыліся да акцыі ўжо як валанцёры і запрашаюць далучыцца ўсіх жадаючых.
"Літаральна перад вамі тэлефанавала жанчына, пыталася, а ці можна прыехаць з 9-гадовым хлопцам. Я сказаў, вядома. Мне здаецца, для дзяцей гэта будзе і карысна, і цікава", — заўважыў Ільін.
Нядзельнік ў Баравой пачнецца 29 мая ў 11.00. Пры сабе арганізатары просяць мець рабочую форму. Усім астатнім — вадой, анучамі і мыйнымі сродкамі — абяцаюць забяспечыць арганізатары. У якасці бонусаў памочнікам абяцаюць бясплатную магчымасць блізка пазнаёміцца з экспанатамі музея і зрабіць унікальныя фатаздымкі.
