Колькасць пацярпелых ад укусаў кляшчоў у Беларусі гэтай вясной павялічылася амаль у два разы ў параўнанні з аналагічным перыядам 2015 года. Толькі на працягу сакавіка-красавіка па медыцынскую дапамогу звярнулася 2294 чалавекі. Больш за ўсё пакусаных ў Мінску, Гродзенскай і Брэсцкай абласцях.
"Штогод па медыцынскую дапамогу з прычыны ўкусаў кляшчоў звяртаецца каля 40 тысяч чалавек. На самай справе людзей, пакусаных кляшчамі, значна больш, таму што далёка не ўсе звяртаюцца да медыкаў" — распавёў радыё Sputnik намеснік галоўнага ўрача па медыцынскай частцы Гарадской клінічнай інфекцыйнай бальніцы Мінска Святаслаў Вяльгін.
Пік актыўнасці кляшчоў прыпадае на май. Кляшчы любяць цяпло, але не спякоту. Таму спецыялісты раяць адпачывальнікам спыняцца на сонечных палянах і пазбягаць месцаў з высокай травой у цені.
