МІНСК, 27 мая — Sputnik. Эканоміка Беларусі развіваецца па песімістычным сцэнары, заявіў першы віцэ-прэм'ер Беларусі Васіль Мацюшэўскі.
"Па росце эканомікі ідзем у рамках песімістычнага прагнозу, а гэта вядзе да падзення ўзроўню жыцця насельніцтва, зніжэння аб'ёму фінансавання пэўных дзяржпраграм", — сказаў Мацюшэўскі, адказваючы ў пятніцу ў парламенце на пытанні беларускіх дэпутатаў.
Паводле яго слоў, няўстойлівасць на нафтавым і калійным рынках прывяла да зніжэння валютных паступленняў у краіну на 16%.
"Простых рэцэптаў па аднаўленні эканомікі няма. Гэта сістэмная і доўгая праца", — сказаў Мацюшэўскі.
Ён нагадаў, што па патрабаванні ўрада прэзідэнтам быў зменены парадак аказання дзяржпадтрымкі рэальнаму сектару. "Мы пераходзім на бюджэтаваньне. Дзяржпадтрымка будзе толькі на конкурснай аснове, зараз па кожным прадпрыемстве вырабляецца балансіроўка, аналіз і кантроль за грашовымі патокамі", — сказаў ён.
Мацюшэўскі адзначыў, што ў Беларусі працягваецца рост колькасці устойліва неплацежаздольных прадпрыемстваў. Тут, лічыць першы віцэ-прэм'ер, неабходна рабіць упор не на правядзенне працэдуры банкруцтва, а на дасудовае аздараўленне прадпрыемстваў.
Паводле яго слоў, у цяперашні час завяршаецца праца над новай рэдакцыяй закона аб банкруцтве.
