МІНСК, 7 чэр — Sputnik. Кіраўнік дэпартамента гандлю і паслуг Масквы Аляксей Немярук і міністр сельскай гаспадаркі і харчавання Беларусі Леанід Заяц дамовіліся аб магчымых пастаўках беларускіх прадуктаў у расійскую сталіцу, перадае карэспандэнт Sputnik.
Падпісанне наменклатуры і аб'ёмаў магчымых паставак адбылося ў аўторак у межах Дзён Масквы ў Мінску.
Агульны аб'ём магчымых паставак складзе каля 250 тысяч тон. У гэтыя лічбы ўключаны 48 тысяч тон мяса, 42 тысячы тон жывёльнага масла, 46 тысяч тон бульбы і гародніны і шэраг іншых харчовых тавараў.
Таксама Беларусь паставіць 120 мільёнаў курыных яек.
Падобныя дакументы падпісваюць штогод. Таксама гэтыя дамоўленасці не перашкаджаюць і іншым пастаўкам беларускіх прадуктаў у Маскву. Акрамя таго, Беларусь супрацоўнічае з Масквой у галінах будаўніцтва і машынабудавання.
Беларуская сталіца ў гэтыя дні прымае Трэці Форум рэгіёнаў Беларусі і Расіі. У Мінску ўпэўненыя, што падчас працы форуму абавязкова з'явяцца новыя дамоўленасці і будуць прапрацаваны ці нават заключаны дадатковыя кантракты і пагадненні.
