МІНСК, 17 чэр — Sputnik. Разняволіць дзелавую ініцыятыву і спрасціць працэдуру адкрыцця бізнесу плануюць улады да 2020 года, гаворыцца ў асноўных палажэннях Праграмы сацыяльна-эканамічнага развіцця Рэспублікі Беларусь на 2016 — 2020 гады.
Дакумент, які мяркуецца вынесці на шырокае грамадскае абмеркаванне ў рамках Усебеларускага сходу, апублікаваны ў пятніцу. Апроч іншага, у ім ёсць пункт пра "разняволенне дзелавой ініцыятывы".
"Беларусь — краіна роўных магчымасцяў. Роля дзяржавы будзе заключацца ў стварэнні спрыяльных умоў для ініцыятывы і вядзення бізнесу як у дзяржаўным, так і прыватным сектары. Любы ініцыятыўны чалавек незалежна ад узроўню адукацыі або наяўнасці спецыяльных эканамічных ведаў зможа пачаць сваю справу ў Беларусі або знайсці працу ", — пазначана ў дакуменце.
Плануецца, што дзяржава забяспечыць абарону і недатыкальнасць правоў прыватнай уласнасці, здыме абмежавальныя бар'еры, лібэралізуе кантрольную дзейнасць.
Праграмай прадугледжваецца "увядзенне адміністрацыйнай (а пры паўторным здзяйсненні — крымінальнай) адказнасці за ўмяшанне службовых асоб праваахоўных (кантралюючых, наглядных) органаў у законную дзейнасць суб'ектаў гаспадарання".
Акрамя таго, улады абяцаюць "істотнае зніжэнне" фінансавых санкцый за нязначныя парушэнні, а таксама "радыкальнае спрашчэнне" і скарачэнне відаў і формаў справаздачнасці. Ёсць у пераліку мер і скарачэнне ліцэнзуемых відаў дзейнасці і шэраг іншых прапаноў.
Прапрацаваны ў праграме і стымулюючыя меры для хуткага адкрыцця бізнесу. Улады абяцаюць пакет бясплатных базавых паслуг для бізнесу, укараненне адміністрацыйных працэдур у электронным выглядзе, супрацьдзеянне манапалізацыі рынку.
"Вынікам вырашэння пастаўленых задач стане рост долі суб'ектаў малога і сярэдняга прадпрымальніцтва ў агульным аб'ёме валавога дабаўленага кошту з 28,7% ў 2014 годзе да 40% у 2020 годзе", — рэзюмавалі аўтары праграмы.
Усебеларускі народны сход адбудзецца ў Мінску 22-23 чэрвеня.
