МІНСК, 27 чэр — Sputnik. Развітанне з кампазітарам, былым мастацкім кіраўніком беларускай оперы, адбудзецца ў аўторак у рытуальнай зале Рэспубліканскага клінічнага медыцынскага цэнтра.
Прэзідэнт Беларусі Аляксандр Лукашэнка выказаў спачуванні ў сувязі са смерцю народнага артыста Беларусі Сяргея Картэса. Кіраўнік дзяржавы адзначыў, што творчасць Сяргея Картэса стала сапраўдным прыкладам высокага мастацтва, якое заснавана на класічных прынцыпах і лепшых традыцыях айчыннай школы, арыенцірам для многіх пакаленняў беларускіх кампазітараў.
Сяргей Картэс памёр 26 чэрвеня. Ён быў легендарнай асобай у гісторыі беларускай музыкі і тэатра, напісаў дзесяткі музычных партытур да драматычных спектакляў, пастаўленых у розныя гады ў Купалаўскім і Рускім тэатрах, іншых тэатрах краіны.
Будучы галоўным музычным рэдактарам кінастудыі "Беларусьфільм" у 1980-я, кампазітар напісаў музыку да многіх фільмаў, у ліку якіх знакамітыя "Вазьму твой боль", "Чорны замак Альшанскі" і іншыя.
Міжнародную вядомасць кампазітару прынеслі інструментальныя, а таксама вакальныя і вакальна-сімфанічныя цыклы твораў на вершы Яўгена Еўтушэнкі і Янкі Купалы, Максіма Танка і Гарсія Лоркі, Нікаласа Гільена і Жака Ленуара.
З 1991 года Сяргей Картэс быў дырэктарам Дзяржаўнага тэатра оперы і балета Беларусі і мастацкім кіраўніком оперы, з 1996 да 2002 года кіраваў беларускім Нацыянальным акадэмічным Вялікім тэатрам оперы.
Кампазітарам напісаны 5 опер, а яго балет "Апошні Інка" з поспехам быў пастаўлены ў Гаване. У лютым 2015 гэты балет Сяргея Картэса быў прадстаўлены на сцэне Вялікага тэатра Беларусі (прэм'ерны спектакль называўся "Хто я?")
Унікальная не толькі прафесійная, але асабістая біяграфія беларускага кампазітара. Сяргей Картэс нарадзіўся ў Чылі (куды сям'я яго маці эмігравала ў 1920 годзе з Расіі) і з'яўляўся прадстаўніком старадаўняга расійскага роду, узыходзячага да дваранскіх каранёў пецярбургскай інтэлігенцыі.
Бацька Сяргея Картэса — чыліец. Першыя 20 гадоў жыцця будучы беларускі кампазітар правёў у Аргенціне, вучыўся музыцы ў Буэнас-Айрэсе. У 1947 годзе сям'я падала прашэнне аб савецкім грамадзянстве і вяртанні на радзіму. Прыезд у СССР стаў магчымым у 1955 годзе, а месцам пражывання сям'і быў вызначаны Мінск.
Тут Сяргей Картэс паступіў на кампазітарскі факультэт Беларускай кансерваторыі, дзе яго педагогамі былі знакамітыя Анатоль Багатыроў і Мікалай Аладаў, затым скончыў аспірантуру і пачаў сваё ўзыходжанне на музычны Алімп.
Развітацца з кампазітарам можна будзе 28 чэрвеня з 10:00 да 12:30 у Рэспубліканскім клінічным медыцынскім цэнтры па адрасе вул. Чырвонаармейская, 10 к.2.
