МІНСК, 28 чэр — Sputnik. Гарачае надвор'е вернецца ў Беларусь у чацвер — у рэспубліку прыйдзе цёплае паветра з Міжземнага мора, паведаміў Sputnik у аўторак начальнік службы гідраметэаралагічных прагнозаў Рэспубліканскага цэнтра па гідраметэаралогіі, кантролі радыёактыўнага забруджвання і маніторынгу навакольнага асяроддзя Дзмітрый Рабаў.
Часовае пахаладанне прыйшло ў Беларусь у панядзелак 27 чэрвеня, да гэтага ў краіне тыдзень стаяла вельмі гарачае надвор'е — у суботу 25 чэрвеня тэмпература ў Мінску дасягала 31,5 градусаў цяпла, што стала рэкордам за ўсю гісторыю метэаназіранняў.
"Спёка вернецца ў чацвер, а ў Дзень Незалежнасці чакаюцца навальніцы і дажджы рознай інтэнсіўнасці", — сказаў Рабаў.
Паводле дадзеных сіноптыка, у сераду будзе пераважна без ападкаў, толькі месцамі ва ўсходніх раёнах краіны пройдуць кароткачасовыя дажджы, прагрымяць навальніцы, тэмпература ўначы складзе +12…17°С, днём +23… 29°С.
"З чацвярга ў Беларусь зноў накіруюцца вельмі цёплыя паветраныя масы з Міжземнага мора і тэмпература зноў пойдзе ўверх", — сказаў Рабаў, удакладніўшы, што днём тэрмометры пакажуць +30°С, а ў паўднёва-заходніх раёнах +32°С.
Ліпень, паводле слоў спецыяліста Гідрамета, таксама пачнецца гарачым надвор'ем: у пятніцу да +32°С, у суботу і нядзелю да +34°С, але з праходам атмасферных франтоў месцамі чакаюцца кароткачасовыя дажджы і навальніцы.
