Мінск, 1 ліп — Sputnik. Надвор'е ў ліпені будзе сушэйшым і гарачэйшым, чым павінна быць, паведаміў Sputnik начальнік службы гідраметэаралагічных прагнозаў Рэспубліканскага цэнтра па гідраметэаралогіі, кантролі радыёактыўнага забруджвання і маніторынгу навакольнага асяроддзя Дзмітрый Рабаў.
Спякота ўсталявалася ў Беларусі на мінулым тыдні, у шэрагу населеных пунктаў нават былі пабіты тэмпературныя рэкорды. Цяплейшы чым звычайна будзе і ліпень.
"Тэмпература паветра на 1 — 2°С вышэй за кліматычную норму (норма +17 +19°С). Акрамя таго, ападкаў чакаецца менш, чым звычайна. У большасць дзён будзе стаяць гарачае і сухое надвор'е, якое падвысіць небяспеку пажараў і справакуе зніжэнне ўзроўню вады ў рэках і вадаёмах", — паведаміў Sputnik Рабаў.
Сіноптык нагадаў, што самым гарачым ліпенем у гісторыі быў ліпень 2010 года — сярэдняя тэмпература тады была вышэй за норму на пяць градусаў. А вось ніжэй за норму апошні раз тэмпература ў ліпені была ў далёкім 1990 годзе.
"Дзённая ліпеньская тэмпература паветра ў асноўным змяняецца ад +22°С да +25°С, начная — ад +12°С да +14°С. Абсалютны максімум тэмпературы паветра (+37,9°С) адзначаны ў 1936 годзе на метэастанцыі Лельчыцы 29 ліпеня і на метэастанцыі Гомель 30 ліпеня. Абсалютны мінімум (+0,5°С) зарэгістраваны на метэастанцыі Палеская ў ноч на 18 ліпеня 1979 года", — дадаў Рабаў.
Звычайна ў ліпені ад 12 да 16 дзён з ападкамі, але іх, паўтарыў сіноптык, зноў чакаецца менш. У той жа час, не зважаючы на перавышэнне нормы, ліпень можа аказацца не такім гарачым, як апошнія дні чэрвеня.
