МІНСК, 6 ліп — Sputnik. Беларускія салаўі завяршылі сезон спеваў, паведамілі Sputnik у грамадскай арганізацыі "Ахова птушак Бацькаўшчыны".
Беларускія бердвочэры выявілі ў гэтым годзе 230 "салаўіных кропак" па ўсёй рэспубліцы. Больш за ўсё мілагучных птушак было зарэгістравана ў Мінску і Магілёўскай вобласці.
Як паведамілі ў АПБ, салаўі завяршаюць свой "сезон салаўіных опер". Традыцыйна ў нашых шыротах гэтыя птушкі спыняюць спевы да пачатку ліпеня. Апошнія спевы салаўя сёлета былі зарэгістраваны 22 чэрвеня.
"Такія познія спевы адзінкавых асобін, на жаль, сведчаць, што салавей не знайшоў сабе пару або што ўжо створанае гняздо было страчана", — адзначылі арнітолагі.
У наступны раз пачуць спевы салаўёў беларусы змогуць не раней мая наступнага года.
Аддаюць перавагу гэтыя птушкі зялёным насаджэнням, але часам селяцца і побач з людзьмі.
