МІНСК, 6 ліп — Sputnik. Міністэрства лясной гаспадаркі Беларусі заклікае беларусаў пасля збору ў лясных угоддзях ягад і грыбоў выносіць з лесу смецце.
Як распавёў журналістам начальнік упраўлення лясной гаспадаркі Міністэрства лясной гаспадаркі Беларусі Мікалай Юрэвіч, у бягучым годзе прагназуецца сярэдні, а месцамі і высокі ўраджай ягад і грыбоў.
"Наша насельніцтва ўжо непасрэдна займаецца зборам ягад", — адзначыў чыноўнік.
Таксама Юрэвіч распавёў пра тое, што ў мінулым годзе была "сур'ёзная" супрацьпажарная абстаноўка — улады ўводзілі вялікую колькасць забаронаў на наведванне лясоў, якія пачыналі дзейнічаць ужо з вясны. "І смецця было значна менш, чым зараз. Калі насельніцтва не ідзе ў лес — у гэтым таксама ёсць свая карысць. Пайшоў у лес — разам з ягадамі павінен вынесці і сваё смецце, я так думаю", — сказаў на заканчэнне ён.
