МІНСК, 14 ліп — Sputnik. Міністэрства гандлю Беларусі адзначае, што буйныя гандлёвыя сеткі і прадпрымальнікі працягваюць увозіць у краіну тавары, якія прызнаныя небяспечнымі і забароненыя да ўвозу і абарачэння на тэрыторыі рэспублікі.
Пачынаючы з трэцяга квартала 2015 года на сайце Мінгандлю ў раздзеле "Гандлёвая інспекцыя" размяшчаецца Рэестр юрыдычных і фізічных асоб, якія імпартуюць у Беларусь небяспечную прадукцыю, і небяспечнай прадукцыі, забароненай да ўвозу і (або) абарачэння на тэрыторыі краіны.
У сувязі з гэтым у прэс-службе Мінгандлю прывялі словы першага намесніка міністра гандлю Артура Карповіча, які заявіў пра тое, што з пачатку трэцяга квартала ў Рэестр уключаны звесткі пра 277 суб'екты гаспадарання і больш чым 450 відаў харчовых і нехарчовых тавараў.
"У ліку імпарцёраў-парушальнікаў маюцца як буйныя гандлёвыя сеткі, так і індывідуальныя прадпрымальнікі, а ў пералік імпартных тавараў, забароненых да ўвозу і рэалізацыі, трапляюць дзіцячыя цацкі, абутак, адзенне для дзяцей дашкольнага і малодшага ўзросту, школьныя прыналежнасці, посуд кухонны, выдавецкая і кніжная прадукцыя, мэбля, касметычныя сродкі, бялізнавыя, медыцынскія і піратэхнічныя вырабы, лямпы святлодыёдныя і іншыя тавары", — адзначылі ў Мінгандлі.
Паводле дакументаў, небяспечныя тавары выраблены ў Кітаі, Польшчы, Украіне, Турцыі, Італіі, Расійскай Федэрацыі і іншых краінах.
У ведамстве звярнулі ўвагу, што імпарт небяспечнай прадукцыі з'яўляецца парушэннем патрабаванняў указа прэзідэнта, які быў прыняты ў лютым 2015 года. За такія парушэнні Гандлёвая інспекцыя Мінгандлю ўжо склала больш за 230 пратаколаў, прад'яўлена да выплаты па рашэннях судоў штрафных санкцый на два з лішнім мільярды рублёў (недамінаваных).
"Наша краіна не можа і не павінна быць тэрыторыяй для рэалізацыі няякаснага імпарту, часам сумніўнага паходжання", — сказаў Карповіч.
Першы намеснік міністра падкрэсліў, што праца ў гэтым напрамку будзе працягнутая і ў міністэрстве антыманапольнага рэгулявання і гандлю, якое ствараецца на базе Мінгандлю.
